A Matter of Priority

A Matter of Priority

Talk about missin’ de boat. De UNC fightin as if dey have nutten betta to do wit dey time, money or life, de PNM runnin’ de country blindly, Mannin’ an’ he boys strugglin’ to win public favour, peltin’ money way on all kinda gran’ gran’ schemes, ‘fuh de bettament of de nation’ of course, new highway, new smelta plant, new buildin’ here, new buildin’ there, no new jobs doh, no new healt’ system, no new ideas fuh easin’ up de crime, de kidnappins unda lows, buh maybe not, maybe it jus eh makin’ de papers no more because why?, de damn chirren in de UNC smilin’ wit all de attention dey gettin’ from de media, all de while, de gunman still runnin amok, de smugglers doin dey ting on de side, nobody studyin’ dem, de politicians doin dey bobol behin’ de curtains of parliament, Ellis re-draffin de constitution and NOT AH MAN sayin ah word in about it in de papers, yet, dey make so much fuss bout dis problem, dat problem, and dey lettin’ ellis and he cohorts turn we country in to ah model of yankee politics?? Papayo, allyuh people does make me laff wi, dat is why ah love allyuh so, because none ah we go eva change in dis country, we too happy wit we life, we eh have de belly fuh hard work, change might make we poor, so who wha change, ideas does cause trouble, who want ideas, we too stubborn to accept ah new, fresh way ah tinkin, Dooks willin’ to try something new, Wade fightin’ he dong wit one setta stupid talk bout WAR. WAR??? Steups. Allyuh eh play allyuh dotish in allyuh political circles nah. Ah bright man like Fitzgerald go stann up an bawl Trinidad & Tobago on par wit London when it come to crime! Hahah, an we eat dat garbage de man talk, nobody eh study dat London have 10 million people, wit one hundred and sixty five murders between July 2005 and July 2006, Trinidad have 1.3 million, how much man dead, THREE HUNDRED AND EIGHTY SIX between January and December 2005. Why he talking rubbish to de people, to what end ah man mus get up in public office an’ purposely try to insult we intellek? Man like Bas talkn bout comin out ah retirement. Bas why yuh doh buy ah lil house in Mayaro and relax yuhself. We eh want nutten from you no more. Yuh come in, yuh do yuh ting, yuh make ah lil kakada, res’ yuhself now nah man. Wha’ you could possibly do fuh de country again, yuh do enuf, an all de cane workers love yuh fuh wha yuh do fuh dem back in de day, buh you jus wha keep man in de cane field while you perch atop de hill, nah dah hard life fuh de people hadda done man, keepin’ man dong wit one setta race talk, nobody cyah move forward ‘cause allyuh jus fillin’ man head wit ah setta racial ting, dividin’ happy neighbours, wha wrong wit allyuh? We have ah nice set up here man, allyuh politician jus playin’ games, cyah even make tings right in yuh own house, wha yuh go fuh we country? Wha Abu up to dese days by de way! I eh hear bout he in ah long time, like he mus be cut ah small deal, relaxin dong de islands somewhey. An wha bout Senator Ato! Haha, dah man make me laff wi, imagine he come in de game braps, dry so, de man eh say one word to de public, as far as I know, de man eh do nutten, buh ah see him limin in germany doh, yea, de new senator on vacation takin in de football, good fuh he ah say, buh why on we back? Wha plan ah action de man have? Wha we go do, at least dey hol ah man fuh poor Shazad life, yuh know dat wouldn’ta happen long time, de ‘forces was ah lock dong clique, ah bruddahood, but de people getting smart, dem charlieville people do de right ting, dey stann up fuh deyself, dey recognise ah injustice an dey eh take no BS from dem officials bout wha, ah pirogue rammin ah CG vessel? Steups, please. Nex ting yuh know if yuh hit ah man car from behind, he pullin out gun to shoot yuh, dry so, but yuh know wha, it have some good people out here, man who know whey he priorities lie, man who eh fraid to stann up an scream at dem monkeys makin’ ah mess ah we country, an dem is de men we need in de front to lead we, to take de country forward, to provide innovative, fresh ideas fuh we people, dem is de men who care, not bout dey own pocket, buh dey care about de welfare of de nation. All ah we is one family, leh we start actin so nah.